Cuimhní Gaeltachta

An tseachtain seo ar "Cuimhní Gaeltachta" labhraíonn muid le Neil Comer, léachtóir Gaeilge in Ollscoil Uladh agus Uachtarán ar Chomhaltas Uladh. As Iúr Cinn Trá ó dhúchas, d’fhreastail Neil ar an choláiste samhraidh i nDún Lúiche le linn a óige, seachas bliain amháin a chaith sé i Rann na Feirste. Cé go bhfuil ceangal mór aige leis an Ghaeltacht trí chéile, is le Dún Lúiche a chroí go fóill. Ní amháin go ndeachaigh áilleacht an cheantair i bhfeidhm air agus é ag freastal ar na cúrsaí samhraidh ann ach thug muintir na háite, agus scoth na múinteoirí a bhí aige, spreagadh dó leanúint ar aghaidh leis an Ghaeilge agus a shaol a chaitheamh ag obair in earnáil na teanga.

Ar 'Cuimhní Gaeltachta' na seachtaine seo tá muid ag dul ó Choláiste Mhuire Loch an Iúir go Coláiste Gael Linn i Machaire Rabhartaigh. Is as an Ómaigh ó dhúchas í Michaeline Donnelly agus í ag obair anois i mBéal Feirste leis an chomhlacht léiriúcháin Tobar. Labhrann Michaeline linn faoi na cuimhní is mó atá aici faoi na samhraí breátha a chaith sí ag foghlaim Gaeilge i dTír Chonaill. Buaicphointí na bliana a bhí sna tréimhsí sin sa Ghaeltacht, an spraoi a bhain leis, na cairde a rinne sí, gan dearmad a dhéanamh faoina bheith ag titim i ngrá...

Inniu ar 'Cuimhní Gaeltachta' tá an scríbhneoir agus blagadóir Gráinne Ní Ghilín ag labhairt linn. D’fhreastal Gráinne ar Choláiste Mhuire Loch an Iúir agus d’imigh sí ann chóir a bheith achan bhliain a bhí sí ar an mheanscoil. Labhraíonn Gráinne faoin chúis a raibh sise agus a cuid cairde ar bís agus iad ag dul ar an bhus go Loch an Iúir don chéad uair. Chomh maith leis sin cluineann muid faoin bhéile breá a bhí ag fanacht orthu i ndiaidh an turais fhada sin.

Sa dara cuid seo den tsraith úr *Cuimhní Gaeltachta* labhraíonn muid le Dónall Mac Murchaidh. Is as Contae an Dúin é Dónall agus aithne ag daoine air mar chraoltóir le Raidió Fáilte i mBéal Feirste. Chaith Dónall a chuid óige ag freastal ar Choláiste Bhríde i Rann na Feirste agus is iomaí dea-chuimhne atá aige faoin am a chaith sé sa Ghaeltacht. Labhraíonn Dónall faoi cad a shíl sé den cheantar nuair a chuaigh sé ann don chéad uair agus faoi na cairde a rinne sé agus é ann, cairde a bhfuil sé iontach mór leo go fóill. Chomh maith leis sin cluineann muid faoi bhean an tí den scoth a bhí acu agus na béilí deasa a d’ullmhaigh sí dóibh.

Inniu cuireann *Meon Eile* tús le sraith úr darb ainm *‘Cuimhní Gaeltachta’*. Tá na céadta scoláire ar a mbealach go Colaiste Mhuire Loch an Iúir agus go Colaiste Bhríde Rann na Feirste an deireadh seachtaine seo, agus cuid mhór acu ag teacht chun na Gaeltachta don chéad uair riamh. Cad é a shílfidh siad den cheantar? Cad é faoi mhná na dtithe agus an bia a bheas ar fáil? An mbeidh grá dílis acu don Ghaeilge agus iad ag dul abhaile arís i ndiaidh an chúrsa? Is eispéireas é an cúrsa samhraidh Gaeltachta a bhfuil taithí ag an mhórchuid againn air. Bíonn taithí éagsúil ag gach duine ach is minic cuimhní láidre ag daoine ar na turais speisialta seo a rinne siad le linn a n-óige. Beidh muid ag dul siar ar na Cuimhní Gaeltachta seo le linn na sraithe.