Don dara bliain i ndiaidh a chéile, eagraíodh Féile Sean-Nóis Ard Mhacha Theas i dTí Chulainn ar an Mhullach Bán i ndeisceart an chontae.
Is iad Gaelphobal Ard Mhacha Theas a bhíonn i mbun na féile seo agus i mbliana bhí scoth an cheoil le cloisteáil ó thús deireadh. Bhí idir cheardlanna agus chomórtais ann ar an lá, iad uilig ag ceiliúradh thraidisún an tsean-nóis, go háirithe na hamhráin áitiúla ón cheantar féin.
Thug Meon Eile cuairt ar an chomórtais ag deireadh an lae agus bhí reimse leathan catagóirí ann, ó pháistí faoi 9 mbliana d’aois go dtí daoine fásta.
Labhair muid le buaiteoir Chorn Mhic Cumhaigh, an comórtas sinsir, Gearóid Ó Deoráin, faoin chaighdeán ceoil a chonaic sé, go hairithe i measc na ndaoine óga, agus faoin bhród a mhothaíonn sé go bhfuil a leithéid d’fhéile ar siúl sa cheantar.
Mar eagraitheoir ar an lá bhí Oifigeach Forbartha GaelPhobal Ard Mhacha Theas, Bridie Ní Shúilleabháin, a dúirt go bhfuil méadú tagtha ar líon na ndaoine a bhíonn ag freastal ar an fhéile agus gan í ach dhá bhliain ar an fhód.
Is iad Máire Ní Choilm agus Antaine Ó Faracháin, beirt ceoltóirí agus amhránaithe clúiteacha, a bhí ina moltóirí ar na comórtais. D’inis Antaine dúinn faoin atmaisféar galánta a bhí ann ar an lá agus an tacaíocht a thug na hiomaitheoirí dá chéile.
Seo iad buaiteoirí na gcomórtas:
Corn Uí Annáin - Comórtas 9-12
1ú: Neansaí Nic Domhnaill
2ú: Tess Nic Dhonaile
3ú: Neasa Ní Ghribín
Corn Uí Arbhasaigh - Comórtas 12-15
1ú: Síomha Ní Ghribín
2ú: Katie Nic Uileann
3ú: Lauren Nic Con Midh & Aodhan Glas
Corn Chlann Mhic Eoghain - Comórtas 15-18
Buaiteoir - Aoibhinn Ní Chroibhín
Corn Mhic Cumhaigh - Comórtas Sinsir
1ú: Gearoid Ó Deorain
2ú: Aine Ní Bhreisleáin
3ú: Feilimí O’Connor & Bláithín Mhic Cana