Thug Buaiteoir Steip 2025 Becky Ní Éallaithe agus a hathair Donncha cuairt ar Chultúrlann McAdam Ó Fiaich, Béal Feirste, le linn Belfast TradFest na bliana seo le caint a thabhairt faoin damhsa ar an tsean-nós agus an nasc atá aige le Gluaiseacht Chearta Sibhialta na Gaeltachta.
Tháinig idir óg agus aosta le freastal ar an chaint. Bhí roinnt mhaith acu ag freastal ar cheardlanna damhsa a bhí mar chuid de Belfast TradFest agus a bhí á dteagasc ag Becky í féin.
Mhínigh Donncha tús Ghluaiseacht Chearta Sibhialta na Gaeltachta sna 1970idí agus nach raibh aitheantas ná ainm fiú ar an damhsa ar an tsean-nós ag an am. Phléigh sé an obair a rinneadh sna blianta ina dhiaidh sin le haitheantas a thabhairt dó agus le líon na ndamhsóirí a mhéadú. I ndiaidh do Dhonncha stair an damhsa a insint, thug Becky roinnt samplaí de stíleanna éagsúla damhsa. Labhair Becky agus Donncha le Meon Eile faoin scéal agus faoin saineolas a bhí á roinnt acu le linn an imeachta.
Cuireadh críoch leis an chaint le damhsa agus bhí fáilte roimh éinne a bhí i láthair cúpla steip a dhéanamh – deis a tapaíodh le fonn!
