Ba chúis mhór cheiliúrtha é nuair a seoladh An Foclóir Nua Gaeilge in EPIC, Músaem Imirce na hÉireann, i mBaile Átha Cliath i mí na Nollag. Is í Uachtarán na hÉireann, Catherine Connolly, a sheol an togra ceannródaíoch seo i gcuideachta grúpaí agus ionadaithe ó phobal na Gaeilge as gach cearn den tír.
Is é Foras na Gaeilge a mhaoinigh an foclóir agus Pádraig Ó Mianáin an Príomheagarthóir Foclóireachta. D’inis Pádraig dúinn faoin obair dhícheallach a rinne an fhoireann chun an chéad leath den fhoclóir a sheoladh. Beidh an chuid eile den tionscnamh ar fáil faoin bhliain 2027.
Is é Cormac Breathnach an Bainisteoir Tionscadail ar an fhoclóir, agus dúirt sé linn gur dearfach an tionchar a bheidh ag an áis nua. Tá Cormac den tuairim gur fearr i bhfad dul sa tóir ar mhíniú na bhfocal trí mheán na Gaeilge seachas a bheith ag iarraidh iad a aistriú go Béarla, agus muid ag obair i dtreo saol iomlán trí Ghaeilge chomh maith le bheith ag feabhsú an chaighdeán Gaeilge atá againn féin.
Tá Foras na Gaeilge iontach buíoch den Uachtarán Catherine Connolly atá ‘hambasadóir láidir’ ar son na teanga.
Ag trácht di ar an fhoclóir nua aonteangacha, dúirt an tUachtarán Connolly: “Is uirlis riachtanach in aon teanga bheo é mórfhoclóir comhaimseartha sa teanga sin, ina bhfuil an teanga agus dúchas na teanga sin á sainmhíniú ina focail féin agus ag a pobal féin, seachas a bheith de shíor á sainmhíniú trí mheán teanga eile. Cuireann an foclóir nua seo an Ghaeilge agus a pobal ar comhchéim le teangacha agus le pobail teanga eile ár linne, agus tá acmhainní foclóireachta na Gaeilge anois ina n-eiseamláir dhea-chleachtais ag teangacha mionlaithe eile ar fud an domhain.”
Thig leat An Foclóir Nua Gaeilge a úsáid anseo.
