Niamh Ní Ruadhagain
Is i dTigh Mhadáin i mBéal Feirste a seoladh Scoil Gheimhridh Ghaoth Dobhair ar na mallaibh. Bhí thuas staighre plódaithe agus clár RTÉ Raidió na Gaeltachta ‘Cóisir Cheoil’ ag craoladh beo ón láthair chlúiteach.
Bhí an áit plódaithe le ceoltóirí agus daoine a tháinig síos le tacú leis an fhéile. Bhí spion iontach ar achan duine, agus bhí Dónall Mac Ruairí, láithreoir an chláir, mar a bhíonn sé go minic – ag preabadh thart idir agallaimh agus ag damhsa leis an cheol mar a bheadh sé ag ceolchoirm!
Dúirt Cathal Ó Curráin, Stiúrthóir Scoil Gheimhridh Ghaoth Dobhair, go mbíonn seoltaí ann fud fad na tíre achan bhliain le cuidiú leis an fhéile agus go mbíonn muintir Bhéal Feirste, go háirithe le cúpla bliain anuas, thar a bheith tacúil.
I measc na ndaoine a chuala muid ar an lá bhí Bláithín Mhic Canna, The Railway Boys, Naoise Mac Cathmhaoil, Edel Ní Churraoin, Cathal Ó Curráin féin, Erin Rose & Piaras Ó Maoláin, le cois ceoltóirí eile.
Tuilleadh eolais faoin fhéile: www.scoilgheimhridh.com
