Bhí roinnt comórtas ar siúl in Áras Mhic Reachtain i dTuaisceart Bhéal Feirste ar na mallaibh mar chuid den fhéile bhliantúil rathúil, Seán-Nós na Fearsaide.
I measc na n-imeachtaí go léir bhí comórtas faoi aois (faoi 9 agus 12), Corn Mhic Aindreasa (faoi 18), agus cúpla comórtas úrnua, Lúibíní do dhaoine fásta (Corn Fhoras na Gaeilge) agus Corn Ghlór na Fearsaide, comórtas cáilithe amhránaíochta do dhaoine fásta.
Bunaíodh Sean-Nós na Fearsaide siar in 2014 agus ó shin tá fás agus forbairt ollmhór tagtha ar an fhéile agus ar an phobal thart uirthi. Ag an tús, cuireadh ceardlanna amhránaíochta agus oícheanta airneáil ar siúl le blaiseadh a thabhairt do dhaoine ar stíl an tsean-nóis. Cuireadh le líon na gcomórtas thar na blianta agus anois bíonn liosta iontach d'aíonna ag teacht as gach cearn den tír le freastal ar an fhéile i rith na deireadh seachtaine agus le páirt a ghlacadh sna comórtais.
Cuirtear an-bhéim ar pháistí a mhealladh isteach chuig na comórtais fosta. Cuireann sé sin go mór leis an chultúr Ghaelach i mBéal Feirste, áit a bhfuil rath ar na healaíona traidisiúnta chomh maith leis na healaíona nua-aimseartha.
Thug Meon Eile cuairt ar Áras Mhic Reachtain agus Sean-Nós na Fearsaide faoi lán seoil. Labhair muid leis an Oifigeach Ealaíon Gaeilge, Daithí Mac Uait, le Piaras Ó Lorcáin, an chéad bhuaiteoir den chorn 'Glór na Fearsaide' agus le Caoimhe Ní Chathail agus Róise Nic Corraidh, buaiteoirí chomórtas na Lúibíní.