Beidh Sean-Nós na Fearsaide 2021 ag tarlú ar líne i mbliana ach tá neart imeachtaí ag titim amach san fhéile in ainneoin na srianta. Labhair Meon Eile le beirt amhránaithe aitheanta ar an sean-nós a bheidh ag glacadh páirt san fhéile an deireadh seachtaine beag seo.
Ní bheidh aon teacht le chéile fisiciúil ag Sean-Nós na Fearsaide i mbliana agus is ar líne amháin a chruinneoidh daoine chun céiliúradh a dhéanamh ar an amhránaíocht thraidisiúnta. Chuaigh Meon Eile i dteagmháil le Doiminic Mac Giolla Bhríde agus Bláithín Mhic Cana a bheidh páirteach san fhéile chun níos mó a fháil amach faoi.
Beidh oíche airneáil ar siúl oíche Aoine agus ceolchoirm ar líne oíche Shathairn. Cé gur mór an trua é nach mbeidh na hamhránaithe ar fad baillithe i mBéal Feirste don deireadh seachtaine, creideann Doiminic gur rud dearfach é sa dóigh is go mbeidh daoine fud fad na hÉireann agus níos faide i gcéin in ann freastal ar na himeachtaí ar líne.
Tá meas mór ag Bláithín ar an mhéid atá ar siúl ag Cumann Cultúrtha Mhic Reachtain leis an fhéile seo a eagrú agus tá sí ag súil leis an tsiamsaíocht agus craic a bheidh ann lena linn.
Chun tuilleadh eolais a fháil faoi Shean-Nós na Fearsaide, téigh chuig: https://www.mhicreachtain.com