Tháinig an tríréad ceoil, The Nightingale Trio, anonn go hÉirinn as na Stáit Aontaithe le linn an tsamhraidh agus iad ar camchuairt ar fud na tíre.
Nuair a bhí siad i mBéal Feirste, chuir siad ceolchoirm i láthair i gCultúrlann McAdam Ó Fiaich mar aon le ceardlann cheoil do dhaltaí bunscoile áitiúla.
Ceol as oirthear na hEorpa atá ag na cailíní sa ghrúpa - Sarah Larson, Rachel LaViola agus Charlotte Finegold - agus bhí siad in ann damhsa, seanscealtaí agus amhráin ón dúiche a theagasc do na paistí agus iad a spreagadh chun spéis a chur i gcultúir an domhain mhóir.
Bhí Meon Eile sa Chultúrlann le labhairt leis an triúr ceoltóirí agus iad i mbun na ceardlainne. Labhair muid fosta le daltaí ó Ghaelscoil na bhFál agus lena muinteoir, Niall Ó Maitiú, faoi na rudaí is fearr a thaitin leo agus faoin tábhacht a bhaineann le meas a léiriú do chultúir eile.
Is grúpa gutha ban iad The Nightingale Trio atá sáite i dtraidisiún gutha na mBalcán agus Oirthear na hEorpa. Tá tuilleadh eolais fúthu le fáil anseo.