Tá Féile Peile na nGaelscoileanna ar na buaicphointí is mó i bhféilire na Gaelscolaíochta i mBéal Feirste. Seo an 16ú bliain den fhéile agus bhí baill den eagraíocht Fís an Phobail agus den chlub CLG Laochra Loch Lao ag an tseoladh ar na mallaibh in éineacht le cuid de na bunscoileanna a bheas ag glacadh páirt sa chomórtas.
Is é Brian Mac an tSionnaigh Oifigeach Forbartha Gaeilge Ionad Uíbh Eachach agus labhair sé linn faoin fhéile. Is é príomhchorn na féile ná Corn Uí Mhuirí, atá ainmnithe i ndiaidh peileadóir agus Gael óg, Liam Ó Muirí, a fuair bás 16 bliana ó shin. Dar le Brian go dtagann an fhéile peile leis na luachanna a bhí ag Liam: cur chun cinn na Gaeilge trí na cluichí Gaelacha.
Tá Bríd Nig Aoidh ag obair mar Oifigeach Forbartha Pobail ag Laochra Loch Lao agus labhair sí linn faoin tábhacht a bhaineann le muinín na bpáistí a thógáil trí na cluichí Gaelacha, go háirithe agus an chuid is mó acu ag bogadh ar aghaidh chuig an mheánscoil go luath.
Is cinnte go bhfuil achan duine ag dúil go mór le Craobh Peile na nGaelscoileanna ar an 1 Bealtaine, go háirithe na daltaí a labhair linn faoi na rudaí is fearr leo faoin pheil Ghaelach agus an fhéile.
