Bhailigh scoláirí meánscoile as gach cearn de Chúige Uladh le chéile in Aonach Mhacha i gcathair Ard Mhacha ar na mallaibh fá choinne Chraobh Abair 2025. Is comórtas cainte poiblí é Abair a bhíonn á reáchtáil ag Gael Linn go bliantúil.
Phléigh na daltaí réimse ábhair ar an lá, cuir i gcás na meáin shóisialta, an spórt, an pholaitíocht agus cúrsaí meabhairshláinte.
Ba iad Ruairí Ó Donnáin, Rachel Poland agus Stiofán Carson na moltóirí agus bhí post deacair acu na buaiteoirí a roghnú.
Labhair Meon Eile le Stiofán, atá ina Chomhordaitheoir Forbartha Acmhainní le Turas in Oirthear Bhéal Feirste, agus d’inis sé dúinn faoin ardchaighdeán agus faoi na hábhair shuimiúla a thug lón machnaimh don lucht féachana.
Bhí deis againn labhairt le Póilín Uí Cheannabháin, Feidhmeannach Oideachais le Gael Linn fosta, a mhínigh dúinn an tábhacht a bhaineann leis an chomórtas Abair chun an Ghaeilge a spreagadh i measc scoláirí i gCúige Uladh.