Cé acu is fearr, Ard Mhacha nó Tír Chonaill? Príomhchathair eaglasta na hÉireann nó contae uasal sléibhtiúil na nDálach? Sin í an cheist atá idir chamáin ag Lughaidh agus Emma in agallamh na seachtaine seo.
Conallach
Cad é mar atá tú a chara?
Tá súil agam tú ‘bheith go maith.
Ach nach trua duit a bheith ansin in Ard Mhacha,
In áit a bheith i gcondae den scoth.
Is fearr liom an áit seo Tír Chonaill,
Faoi scáth an Earragail Mhóir,
Níl agaibh ansin i lár tíre
Ach cnoic bheaga ísle, is corr-bhó!
Ard Mhachach
Más íseal na cnoic, bheul is torthúil
Is iad na cnoic iad is saibhre amuigh
Is ní corr-bhó a bhíonn ag siúl orthu,
Ach na mílte, ag innilt is ag spraoi.
Níl agaibh ach caoirigh i dTír Chonaill,
Agus níl siad féin ag iarraidh a bheith ann!
Ní fhásann féar ar leacacha sléibhe
Agus is measa an caorán fliúch lom.
Conallach
Más lom iad na caoráin nach maith dúinn
An mhóin a bheith againn gach lá?
Is nach iontach an boladh deas fáiltiúil
Ó shimléir ar dtithe beaga breátha
Is más garbh iad na sléibhte, is maorga,
Is é an ceantar is deise le fáil.
Tig turasóirí chugainn go rialta
An raibh agaibh aon chuairteoir go fóill?
Machach
Oh, bíonn cuairteoirí againne, cinnte,
Ó thíortha i bhfad is i gcéin.
Thig siad gach bliain ina mílte
Chuig ár gceantar stairiúil féin.
Seo an áit a roghnaigh Naomh Pádraig
Lena chreideamh a thoiseacht sa tír.
Seo príomhchathir chríostúil na hÉireann.
Sin rud nach bhfuil agaibhse thiar.
Conallach
Ach tá stair uasal againn i dTír Chonaill
Chomh huasal le condae ar bith.
Nach anseo a mhair Taoisigh Uí Dhonaill
Agus gach duine acu ina rí!
Machach
Bheul ón am roimhe sin tá áit againn
Inár tharla na heachtraí ba mhó
Bhí Eamhain Mhacha Uasal mar lóistín
Ag Cú Chulainn is Conchubhar fadó
Bhí Cú Chulainn agus laochra Ard Mhacha,
Ar na laochra ba chróga ariamh.
Agus is anseo a cosain siad Uladh
Ó Arm na banríona Méabh.
Conallach
Is maith sin uilig ach cá dtéann sibh
Nuair nach mbíonn sibh ag foghlaim sa rang?
Anseo i dTír Chonaill tá an trá againn
A gcaitheann muid samhraidh ann.
Thig linn Caisleán a dhéanamh sa ghaineamh
Nó a bheith ag snámh linn i rith an lae
Ach cad e is féidir libhse a dhéanamh
Cuachta i lár tír, bheinn ar strae
Machach
Bheul is féidir a bheith ag imirt in Ard Mhacha
Áit a n-imrítear peil mar is ceart
Ach ní thuigfeadh do mhacasamhail sin
Mar tá ré órga na gConnallach thart
Conallach
Oh Tá dul amú ortsa a thaisce
Má shíleann tú sin a bheith amhlaidh.
Bhí muid riamh incurtha libhse
Inné, inniu agus sa todhchaí.
Ach an bhfuil a fhios agat seo a chara
I ndiaidh an méid atá ráite agat
Ba bhreá liom cuairt ar Ard Mhacha
Ar mhiste dá dtiocfainnse chugat?
Machach
Oh tar anseo cinnte agus fáilte
Ba bhreá liom tú a bheith linn
Agus an dtiocfadh liom dul go Tír Chonaill
Is breá liom bhur gcanúint bhinn.
Conallach
Rachfaidh muid thart le chéile
Chun an chósta agus ansin go lár tíre
Le chéile
Tá an dá áit lán spóirt agus féile
Is tá a fhios againn beirt gur fíor é!
