Cuireadh bliots liathróid láimhe ar siúl do Ghaelscoileanna timpeall Bhéal Feirste ar na mallaibh in Iarthar Bhéal Feirste, eagraithe ag CLG Laochra Loch Lao.
Gaelscoileanna i mBéal Feirste a ghlac páirt sa lá spraíúil spleodrach i gcúirt Ard na Carraige i Spórtlann na hÉireann. Bhí daltaí Scoil na Fuiseoige, Gaelscoil na Móna, Scoil an Droichid, Gaelscoil na bhFál, Bunscoil an tSléibhe Dhuibh, Gaelscoil an Lonnáin agus Bunscoil Phobal Feirste uilig i láthair le páirt a ghlacadh sa bhliots.
D’fhreastail Meon Eile ar an ócáid, áit ar labhair muid le Bainisteoir Forbartha Cumainn agus Cluiche Laochra Loch Lao, Damian Mac Ailín, le múinteoir de chuid Bhunscoil Phobal Feirste, Gearóid Mac Seáin agus le beirt daltaí ó Ghaelscoil na bhFál a bhain an-sult as an lá, Fiachra agus Caragh.
Eagraíodh an t-imeacht seo mar chuid de cheiliúradh ar Sheachtain na Gaeilge 2026.
