Rinne Fóram na nÓg ceiliúradh ar na héachtaí a bhain an eagraíocht agus a rannpháirtithe amach le linn 2024/25 i gCultúrlann McAdam Ó Fiaich Dé Sathairn.
Bhí neart scéimeanna á reáchtáil ag Fóram na nÓg ó earrach 2024 ar aghaidh a tharraing dream iontach de dhaoine óga le páirt a ghlacadh iontu, amhail Scéim na bPrintíseach. Lonnaíodh 13 phrintíseach i gclubanna óige, clubanna CLG agus a leithéid le taithí a fháil ar bheith ag obair leis an phobal, agus cuireadh traenáil ar fáil dóibh le go mbainfeadh siad caillíocht OCN ('Open College Network') amach ag deireadh an chúrsa.
Le linn na bliana, bhí deiseanna ag na daoine óga a bhí ar na scéimeanna éagsúla dul thar lear agus foghlaim faoi ghrúpaí eile a bhfuil teangacha mionlaithe á labhairt acu. Thaistil grúpa mór de rannpháirtithe agus oibrithe ó Fhóram na nÓg go Bostún SAM ag deireadh mhí Dheireadh Fómhair. Agus iad ann, fuair siad léargas ó bhundúchasaigh áitiúla ar a gcultúr agus a n-oidhreacht. Chuaigh lucht Scéim na bPrintíseach go Tír na mBascach chomh maith le bheith ag plé leis an phobal Bascach.
Labhair Meon Eile le Caoimhe Nic Cú Uladh, Oifigeach Forbartha na nOibrithe Deonacha le Fóram na nÓg, agus le hOrliath Mhic Leannáin, Stiúrthóir na heagraíochta, faoin bhliain rathúil a bhí acu agus faoi na forbairtí a bhfuil siad ag súil leo agus iad ag cur tús le scéimeanna 2025/26.
