Tháinig roinnt gnóthaí as Gaeltacht Dhún na nGall le chéile ag ceardlann margaíochta de chuid ‘Ceangal G’.
Bunaíodh ‘Ceangal G’ i Meán Fómhar na bliana anuraidh faoi chathaoirleacht Donnie Munro. Tionscnamh maoinithe ag an Aontas Eorpach é CeangalG agus is í an aidhm atá aige ná treisiú ar an chomhobair idir aisínteachtaí san earnáil phoiblí i gceantair teorann in Éirinn agus in Albain.
Bhí Fionbar Ó Baoill i mbun na ceardlainne margaíochta a bhí ar siúl in Aerfort Dhún na nGall. Bhí an t-ábhar dírithe ar an turasóireacht agus an bealach ina dtig leat an saol Gaelach a mharagú sna stíleanna úra atá ar fáil tríd na meáin shóisialta i láthair na huaire.
Bhí Moira Ní Ghallachóir as ‘Rock agus Roam’ i láthair. Chuir Moira tús lena gnó bliain ó shín tar éis tamall fada a chaitheamh ar an choigríoch. Tá ‘Rock agus Roam’ bunaithe ar eachtaí taobh amuigh mar dhreapadóireacht, seoltóireacht, siúl sléibhe, dráma, ióga agus go leor eile.
Dúirt Eilis Barrett ó Aerfort Dhún na nGall go raibh luach agus tábhacht mhór le plean margaíochta a bheith ag gnó ar bith sa lá atá inniu ann le turasóirí a mhealladh chuig an cheantar agus go háirithe leis an aerfort mar áis acu.
Seoladh an chéad ‘SpreaG Fís’ le déanaí. Tá na físéain seo bunaithe ar ghníomhaithe spreagúla teanga as Éirinn agus Albain.
Tá Gearóid Ó Cairealláin as Béal Feirste sa chéad fhíseán atá le feicéail ar an nasc atá thíos.