Gnó

Inniu ar *Meon Eile*, leanann muid leis an tsraith bunaithe ar ghnónna le Gaeilge. Tá an-ráchairt ar ióga sa lá atá inniu ann, le idir óg agus aosta ag baint leasa as mar gheall ar na buntáistí fisiciúla agus intinne atá le fáil as. Is comhlacht í _Óga Yoga_ atá lonnaithe i mBaile Átha Cliath a sholáthraíonn cúrsaí ióga, aireachais agus suanmhachnaimh do bhunscoileanna, do mheánscoileanna, d’ollscoileanna, d’eagraíochtaí agus don phobal mór i gcoitinne. Chas *Meon Eile* le Ciarán Mac Fhearghusa, stiúrthóir _Óga Yoga_ lena cheird agus na buntáistí a bhaineann leis a phlé.

Tháinig earnáil na meán Gaeilge le chéile i mBéal Feirste le ceiliúradh a dhéanamh ar an Chiste Craoltóireachta Gaeilge atá deich mbliana ar an fhód. Is in 2005 a mhaoinigh an Ciste cláracha teilifíse den chéad uair ariamh, agus ó shin tá 800 uair a chloig de chláracha maoinithe acu ar réimse leathan ábhar.

Agus an déine le bheith linn go ceann tamaill eile, fiosraíonn Michaeline Donnelly bealaí le bheith níos seiftiúla lenár gcuid airgid.

Seoladh gréasán gnó dóibh siúd a oibríonn trí mheán na Gaeilge ag bricfeasta maidine i gCultúrlann McAdam Ó Fiach. Is compháirtíocht atá sa togra idir Ceangal G, Glór na nGael agus Cultúrlann McAdam Ó Fiaich. Is é sprioc an togra ná cothú gréasán gairmiúil idir gnólachtaí agus eagrais atá báúil leis an Ghaeilge. Ba é Stiúrthóir Meas Media, Breandán Ó hEadhra, a bhí mar aoíchainteoir na maidine. Seo chugaibh léargas ar sheoladh an ghréasáin, plean na mbunaitheoirí agus tuairimíocht ó lucht gnó Bhéal Feirste...

Tháinig roinnt gnóthaí as Gaeltacht Dhún na nGall le chéile ag ceardlann margaíochta de chuid 'Ceangal G'. Bhí Fionbar Ó Baoill i mbun na ceardlainne margaíochta a bhí ar siúl in Aerfort Dhún na nGall. Bhí an t-ábhar dírithe ar an turasóireacht agus an bealach ina dtig leat an saol Gaelach a mharagú sna stíleanna úra atá ar fáil tríd na meáin shóisialta i láthair na huaire.

Thosaigh Maitiú agus Karola Ó Conaill ag déanamh seacláide i 1978 i gCarraig Uí Leighin, Co. Chorcaí. I 2011, thosaigh iníon s'acu, Aoife, ag díol cuid den tseacláid sin i _Margadh Naomh Seoirse_ i mBéal Feirste chun airgead sa bhreis a shaothrú agus í ag staidéar dlí ar an ollscoil. Ó shin, shocraigh Aoife agus a fear céile, Dominic, leanúint le ceird na seacláideoireachta go lánaimseartha, agus tá siad anois ag déanamh seacláide de lámh ina monarcha i mBéal Feirste. Chaith *Meon Eile* seal le hAoife chun níos mó a fháil amach faoin ghnó, agus ar ndóigh, chun cuid den tseacláid a bhlaiseadh!

Tá Cumann Naomh Uinseann de Pól ag tacú le muintir na tíre le 160 bliain anuas. Thosaigh an charthanacht seo tar eis an Ghórta Mhóir agus atá siad ag cuidiú le daoine i gcruachas ó shin. Sa lá atá inniu ann tá siopaí de chuid Naomh Uinseann de Pól scaipthe ar fud na tíre. Tá na siopaí seo iontach tábhachtach chun airgead a bhailiú don chumann agus téann an t-airgead sin chun sochair don chumann sa cheantar sin.

Bunaíodh ‘Employ Ability Galway’ sa bhliain 2001 mar chuid de 23 comhlacht in Éirinn a thugann tacaíocht do dhaoine le míchumas fostaíocht a aimsiú. Tá clár faoi leith ag ‘Employ Ability,’ Clár Fostaíochta faoi Thacaíocht, ina gcabhraíonn sé le daoine faoi mhíchumas obair a shaothrú. Tá ceithre chéim ag an gclár; (1) Measúnú ar Riachtanais (2) Post a Sholáthar (3) Fostaithe le Tacaíocht ó Thraenálaí Poist (4) Socrú i bPost le hIarchúram nó Comhairleoireacht

Bhunaigh May agus Máirtín Standún siopa beag i gConamara sa bhliain 1946. I 1972 lean an traidisiún sa teaghlach nuair a fuair a mac, Dónal, an ról mar bhainisteoir an tsiopa. Sa lá atá inniu ann tá an traidisiún fós go láidir sa teaghlach, le gariníon May agus Máirtín, Cliona, i gceannais air inniu.

Tá Síoda Lingerie lonnaithe i mBéal Feirste. Is lipéad éadaí codalta agus fo-éadaí atá ann agus iad ar fad déanta le síoda. Bhunaigh Mary Anne Murphy _Síoda Lingerie_ sa bhliain 2009 tar éis di pósadh an bhliain roimhe. Bhí ionadh ar Mary faoin easpa éadaí cnis do bhrídeoga a bhí ar fáil ag an am agus chonaic sí bearna sa mhargadh. Bíonn daoine go hiomláin faoi bhrú agus iad ag ullmhú do bhainis agus tá sé éasca dearmad a dhéanamh faoi oíche an phósta agus céard a bhéas á chaitheamh agat, dar le Mary.

Agus na scoileanna ar ais faoi lán seoil anois, seans go bhfuil tú ag smaoineamh ar rang nua a thriail i mbliana. Cad é faoi ReelRobics? Is é atá i gceist le 'ReelRobics' ná damhsa gaelach measctha le haeróbaic chun damhsa nua spreagúil a chur ar fáil. Bhunaigh an damhsóir ó Bhéal Feirste, Christina McGrath Woods, 'ReelRobics' agus tá sí ag súil go mbeidh sí ag dul ar fud na cruinne leis. Na buntáistí a bhaineann leis ná bheith níos aclaí agus meáchan a chailleadh, do mhatáin a dhéanamh níos láidre, níos mó muiníne bheith agat agus ar ndóigh casadh le cairde nua. D'fhreastail Sarah de Búrca ar rang ReelRobics chun fáil amach an raibh sí in ann aige!

Agus iad ar a laethanta saoire samhraidh i gcontae Aontroma i 2009, is beag a cheap teaghlach McGarvey go raibh síolta gnó á gcur in intinní na mac s'acu, Conor (12) agus Rónan (15). Is ansin a chonaic siad pinn adhmaid á ndéanamh don chéad uair...